Қазақстан авиациясының кәсіби сырқатқа шалдыққан ардагерлерінің алдындағы берешек өтелді

Кездесуде атап көрсетілгеніндей, Қазақстан авиациясы ардагерлерінің бұл мәселемен айналысқанына биыл 6-шы жыл. Осы бағытта үкіметтің бірнеше қаулысы қабылданып, ҚР жоғары сотынан бастап әр сатылы соттарда ондаған шешім шығарылды, ҚР бас прокуратурасының қаулысы жарық көрді, бірнеше мәрте үкіметтік комиссиялар да құрылды. Ақыры, сарғая күткендер мұратына жетіп, ардагерлер мәселесі осы жолы әрең шешімін тапқандай.

Бүгінде, авиация саласы ардагерлерінің қатары да сиреп, 89-дан 74-ке дейін кеміді. Соған қарамастан, ұшқыштар мүддесін қорғаушы Төлеген Әлжановтың айтуынша, бүгінгі күнге тірі жетпеген 15 отбасының мүшелері де нәпақасынан құр қалмай, өтемақыдан өз үлестерін алады.
Бүгінгі баспасөз мәслихатына қатысушылар мәселенің оң шешімін тапқанына ризашылық білдіріп Елбасы Нұрсұлтан Назарбаевтың атына мәлімдеме жолдады. Онда мәселені шешуге ықпалдастық жасаған мемлекеттік құрылымдар мен азаматтық қоғам институттарына алғыс айтылған.
Сонымен қатар, «Чернобыль одағының» өкілдері Қазақстандық ардагер ұшқыштарды Г.Жуков атындағы төс белгімен марапаттау туралы бастама көтерді.