Бұл туралы Baq.kz ақпарат агенттігі primeminister.kz сайтына сілтеме жасап хабарлайды.
Кездесу барысында экономика, сауда-саттық және инвестициялар, достық қарым-қатынасты нығайту салаларындағы екіжақты ынтымақтастықтың өзекті мәселелері талқыланды. Сондай-ақ, елші Дж. Кролдың Қазақстандағы дипломатиялық миссиясының қорытындысы шығарылды.
«Мемлекет басшысы Н. Назарбаевтың Вашингтонға жұмыс сапарынан кейін байланыс одан әрі нығая түсті. Жалпы алғанда, атқарылған жұмыстар арқасында біздің өзара қарым-қатынасымыздың экономикалық құраушысы бұрынғыдан жоғары деңгейге жетті», — деді Премьер-Министр Бақытжан Сағынтаев.
Бүгінгі таңда Қазақстан мен АҚШ арасындағы екіжақты қатынастар кеңейтілген стратегиялық әріптестік деңгейіне шықты. ҚР Премьер-Министрі Б. Сағынтаевтың өткен жылы сәуір айында Калифорния мен Нью-Йоркке жасаған жұмыс сапарының қорытындысы бойынша Сан-Францискода Бас консулдық ашылды. Онда цифрландыру бағыты бойынша «Зерде», «Астана хаб» компанияларының, «Алатау» технопаркінің біріккен өкілдіктері жұмыс істейді. Бас консулдық жұмысы аясында Қазақстанның АҚШ-тың оңтүстік-батысымен, соның ішінде Кремний алқабында орналасқан жетекші америкалық компаниялармен ынтымақтастығы дамуда.
Бұдан өзге, кездесу барысында екі ел арасындағы іскерлік қарым-қатынасты одан әрі дамыту жөніндегі жұмыс жоспарлары талқыланды.
Өз кезегінде, Дж. Крол Қазақстан Президенті Н. Назарбаевтың барлық мемлекеттермен достық өзара қарым-қатынасты дамыту мен нығайту жолындағы стратегиясы мен ерекше рөлін атап өтті.
«Қазақстанның БҰҰ Қауіпсіздік кеңесіндегі рөлі елеулі әсерге ие. Қазақстан – 26 жыл бұрын Кеңес Одағының құрамында болған ел, ал бүгінде аймақтағы және жалпы әлемдегі көш бастаушы елдердің бірі. Қазақстан Президентінің саясаты қарым-қатынасты тұрақтандыру үшін көрші мемлекеттерге өте маңызды», — деді ҚР-дағы АҚШ елшісі.
Дж. Крол Қазақстан Республикасындағы Америка Құрама Штаттарының елшісі ретінде 2015 жылғы 8 қаңтардан бастап жұмыс істейді.