Қазақстан елшісі Сербия және Черногория президентіне сенімхатын тапсырды

Қазақстан Республикасының төтенше және өкілетті елшісі Рахат Әлиев Сербия және Черногория президенті Светозар Маровичке сенімхатын тапсырды. Бұл туралы KZ-today тілшісіне ҚР СІМ-нің баспасөз қызметінен хабарлады.

Мекеме ақпаратына сәйкес, Р.Әлиевтің Белградқа сапары барысында сондай-ақ, осы елдің сыртқы істер министрі Горан Свиланович және сыртқы экономикалық байланыстар министрі Бранко Луковац мырзалармен кездесулері өтті. Тараптар екі жақты қарым-қатынастарды дамыту турасында өзара пікір алмасты.

Кездесулер барысында Қазақстан үкімет басшысының Белград сапарын ұйымдастыру және екі елдің сыртқы істер министрліктері арасында консультациялар өткізу мүмкіндіктері сарапқа салынды.