«Қазақстан үшін Латвияның транспорттық әлеуетін пайдалану мен жүк транзитінің жекелеген бағыттарын өсіру айрықша қызығушылық тудырады», — деді Н. Назарбаев.
Оның айтуынша, тараптар Қытай — Қазақстан — Ресей — Балтық аймағы транспорттық дәлізі арқылы темір жолмен контейнерлік тасымалдарды ұйымдастыру жұмыстарын одан әрі жалғастыруға келісті.
«2003 жылдан бері жұмыс істеп келе жатқан Резекне — Алматы арасындағы «Балтика транзит» контейнерлік маршрутын одан әрі дамыта түсетін боламыз», -деді президент.
Сонымен бірге Елбасы Қазақстан — Латвия ынтымақтастығының оң үлгісі ретінде Вентспилс айлағындағы 2005 жылдан бері жұмыс істеп жатқан екі елдің бірлескен астық терминалын атады. Оны екі ел Қазақстанның астықтан басқа да жүктерін транзитті тасымалдаудың жаңа экспорттық бағыты ретінде қарастырады.
Сонымен бірге тараптар өңдеу саласындағы ынтымақтастық аясын кеңейте түспекші.
Бұған қоса , «Болашақ бағдарламасы аясында білім беру саласындағы байланыстарды дамыту жөніндегі уағдаластық жасалды». «Қазақстан сонымен бірге ақпараттық және коммуникациялық технологиялар саласындағы ынтымақтастықты дамытудан мүдделі. Қазақстан жағы үшін Латвияның мемлекеттік органдарда электрондық басқаруды енгізу тәжірибесі қызықты», — деді мемлекет басшысы.
Ақпаратты пайдаланған жағдайда «Казахстан Сегодня» ақпараттық агенттігіне сілтеме жасау міндетті
