Осы оқиғаға орай «Нанн-Лугар» бағдарламасы деген атаумен белгілі «Қауіп-қатерді бірлесіп азайту» бағдарламасының негізін қалаушылардың бірі, АҚШ сенатының халықаралық қатынастар жөніндегі комитетінің төрағасы, сенатор Ричард Лугар былай деп мәлімдеді: «Мен АҚШ әкімшілігі мен қорғаныс министрлігінің осынау маңызды істі Қазақстан үкіметімен бірлесе жүзеге асыруға бағытталған талпыныстарына ризамын. Президент Нұрсұлтан Назарбаев пен үкіметті құттықтаймын. Бұл халықты жаппай қырып-жоюға арналған қарудың таралу қаупін азайтуға жасалған айрықша маңызды қадам болып табылады».
Ал Қазақстанның АҚШ-тағы елшісі Қанат Саудабаев : «Қазақстанның бұл түзетуге қол қоюы президент Нұрсұлтан Назарбаев пен республика үкіметінің қару таратпауға бағытталған табанды әрі жүйелі саясатының дәлелі болмақ. Халықты жаппай қырып-жоюға арналған қарудың залал-зардабын тікелей татып көрген Қазақстан халқы осынау өлім сепкіш қарудың таралуына қарсы ғаламдық күрестің алғы шебінде бұдан былай да қала бермек»,- деді.
Қол қойылған түзетуде Қазақстанда биологиялық қару таралуының алдын алуға бағытталған жобаларды қаржыландыру көлемін АҚШ тарапынан 35 млн. долларға арттыру көзделген.
Бұдан бұрын да хабарлағанымыздай, 2003-жылдың тамыз айында елімізге келген сенатор Р.Лугар үкімет басшысымен кездеуде биологиялық қарудың таралуына жол бермеу мен биологиялық лаңкестікпен күрес саласындағы Қазақстан-АҚШ ынтымақтастығының келешегі туралы талқылаған.
Осындай уағдаластық бойынша «Нанн-Лугар» бағдарламасы аясында диагностикалық анықтамалық зертхана салу, сондай-ақ, болуы ықтимал лаңкестік әрекеттердің салдарынан жұқпалы аурулар мен эпидемиялардың табиғи белең алуына төтеп беру, диагноз қойып анықтау, танып білу мүмкіндіктерін нығайту үшін Қазақстанда жұқпалы ауруларды қадағалау жүйесін құру межеленген. Сондай-ақ, Орталық Азия аймағындағы жұқпалы ауруларды емдеу үшін бірлесе отырып жаңаша молекулярлық диагностика және терапия тәсілдерін жобалау жоспарланды.
- $ 519.61
- € 610.13
Алматы
- РУС
- ҚАЗ
2025 Жыл
17 Желтоқсан
