Бұл туралы бүгін Астанада ҚР Үкімет басшысы Серік Ахметовпен болған кездесуден кейінгі баспасөз мәслихатында Беларусь Премьер-Министрі Михайл Мясникович мәлім етті.
Инвестициялық ынтымақтастық аясында жаңа кезеңге жол ашылып отырғандығына тоқталған ол: «Біз нақты қандай зауыттарды құратынымызды және қалай құратынымызды өзара келістік. Яғни, машина құрылысы, ауыл шаруашылығы, химия салалары қамтылатын болады. Бұл алдағы 1-2 жылда жүзеге асырылатын нақты жобалар»,-деді. Ол бұлардың барлығы екі елдің президенттері деңгейінде қол жеткізілген келісімдер аясында екендігін айтып өтті. «Әрине, атқарылатын жұмыстар оңай емес. Бізді күрделі шаралар күтіп тұр. Алайда, біздің өзара сенімді қарым-қатынастарды ескере отырып, алдағы мақсаттарды толығымен іске асырамыз деген ойдамын»,-деді Беларусь Премьер-Министрі.
М. Мясникович бұл жобалар болашаққа негізделгенін айта келе, мән-маңызға ие болып отырған жобаның бірі — ауқымды үлкен химия саласына қатысты екендігін жеткізді.
Осы орайда ол «Могилев химталшық» базасында қазіргі заманғы үлкен акционерлік қоғамды ұйымдастыру Қазақстан мен Беларустың экономикасын көтеруге зор ықпал жасайтындығын айтты. Жоба 1 млрд. АҚШ долларына жуық қаржыға бағаланып отыр.
«Бұл ірі Еуразиялық жоба болмақ. Яғни, ол Бірыңғай экономикалық кеңістіктің ішкі нарықтарында ғана емес, сонымен қатар үшінші мемлекеттердің нарығында да жұмыс істейді»,-деп түйді Беларусь Премьер-Министрі.