Қазақстан мен Біріккен Араб Әмірліктері үкіметаралық комиссиясының тұңғыш отырысында экономика және сауда саласындағы ықпалдастық перспективалары талқыланды

11-12-желтоқсанда Абу-Даби қаласында Қазақстан мен Біріккен Араб Әмірліктері арасындағы ынтымақтастық туралы үкіметаралық комиссияның алғашқы отырысы өтті. Осындай комиссия құру туралы шешім Қазақстан президенті Нұрсұлтан Назарбаевтың 2004-жылғы қаңтардағы Біріккен Араб Әмірліктеріне жасаған ресми сапары кезінде қабылданған болатын. Бұл туралы KZ-today тілшісіне ҚР СІМ-нің баспасөз қызметінен хабарлады.

Бас қосудың алғашқы күні ҚР үкімет басшысының орынбасары, Қазақстан мен Біріккен Араб Әмірліктері үкіметаралық комиссиясының тең төрағасы Ахметжан Есімов Біріккен Араб Әмірліктерінің президенті Шейх Халифа Бен Заид Аль-Нахайянмен кездесті. Үкімет басшысының орынбасары шейх мырзаға ҚР президентінің жеке жолдауын табыс етті.

Бұдан кейінгі кездесу барысында тараптар өзара тиімді ынтымақтастықты тереңдетуге байланысты бірқатар мәселелер топтамасын талқылады. Өз тарапынан Шейх Халифа Бен Заид Аль-Нахайян Біріккен Араб Әмірліктерінің сауда-саттық және экономика, көлік және коммуникация, шағын және орта бизнес саласындағы ынтымақтастық әлеуетінің көзін ашуға деген ынта-ықыласын тағы бір дәлелдеді.