Қазақстан мен Өзбекстан ІІМ лаңкестікпен күрес саласындағы ықпалдастық мәселелерін талқылады

Астанада Қазақстан ішкі істер министрі Зауытбек Тұрысбеков пен Өзбекстан ішкі істер министрінің бірінші орынбасары Тахир Муллажановтың кездесуі өтіп, онда шекаралас аймақтардағы ұйымдасқан қылмыспен, экстремизм және лаңкестікпен күрес саласындағы ықпалдастық мәселелері сарапқа салынды. Бұл туралы KZ-today тілшісіне ҚР ІІМ-нің баспасөз қызметінен хабарлады.

Кездесуде сондай-ақ ҚР ІІМ-нің қызметкерлерін экстремизм және лаңкестікпен күрес мәселелері бойынша Өзбекстанның оқу орындарында оқыту мүмкіндіктері талқыланды.

З.Тұрысбеков пен Т.Муллажанов екі мекеме қызметкерлерінің кездесуін 2005-жылдың мамыр айында өткізуге келісті. Онда трансұлттық қылмыспен күреске бағытталған бірлескен шешім шығарылады. Жұмыс топтарының құрамына екі ел ішкі істер министрліктерінің басшылары мен шекаралық аймақтардың ІІББ мен ІІБ-ның бастықтары енеді.