Қазақстан мен Таиланд туризм саласындағы ынтымақтастық аясын кеңейтуге мүдделі

Бангкок губернаторы Самак Сундураведж мырзаның пайымдауынша, Қазақстан мен Таиланд арасындағы туризм саласындағы ынтымақтастық аясы жуық арада кеңейтілуге тиіс. Бұл туралы ол бүгін, 9-маусымда Астанада Елбасы Нұрсұлтан Назарбаевпен кездесуден кейін журналистерге хабарлады.

Бангкок губернаторының айтуынша, ол Астанаға Қазақстан жағының шақыруымен мұнай бизнесі, құс шаруашылығы және туризм саласында қызмет ететін Таиланд кәсіпкерлерінің ауқымды тобын ілестіре келген.

Самак Сундураведж мырза таяу уақыттарда «екі ел арасындағы туристік бизнес аясы кеңейе түседі» дегенге сенім білдірді. Оның пайымдауынша, «екі жақты барыс-келіс бір жақтылықтан арылып, қазақстандықтар ғана Таиландыға бара бермей, Таиланд тұрғындары да Қазақстанға келетін болады». «Қазақстанға біз 6-8 сағат қана ұшып жетіп, шаңғы тебетін боламыз»,- деді ол.