Үкіметтің баспасөз қызметінен мәлім еткендей, кездесу барысында Ж-Ш. Бертонэ елімізді Астананың «Экспо-2017» халықаралық мамандандырылған көрмесін өткізу құқығына ие болуымен құттықтады.
Өз кезегінде, С.Ахметов Қазақстан елордасын қолдағаны үшін Франция еліне алғысын білдірді. «Қазақстан таңдап алған көрме тақырыбы — «Болашақ энергиясы» — әлемдік қауымдастық үшін өте маңызды. Тәжірибесі мен технологиялық жетістіктері арқылы Франция көрмеде өзін биік деңгейде көрсетеді деп сенемін», — деді С.Ахметов.
Кездесу барысында сауда-экономикалық және мәдени-гуманитарлық ынтымақтастықты нығайту мәселелері талқыланды.
«Қазақстан Үкіметі Франциямен сауда-экономикалық байланыстарын одан әрі дамыта беруге ниетті. Біздің екіжақты қарым-қатынастарымыз сапалық жаңа деңгейге көтеріліп, Қазақстан-Француз ынтымақтастығының одан әрі тереңдей түсуіне серпіліс алады деп үміттенеміз», — деп атап өтті С.Ахметов.