Қазақстан-Беларусь үкіметаралық комиссиясының 9-шы отырысының хаттамасына қол қойылды

Аталған құжатқа комиссияның тең төрағалары ҚР Төтенше жағдайлар министрі Владимир Божко мен Беларусь Премьер-Министрінің орынбасары Михаил Русый қол қойды. Айта кетейік, бүгінгі отырыс барысында сауда-экономикалық ынтымақтастықтың болашақ бағыттары, екінші Қазақстан-Беларусь іскерлік форумын ұйымдастыру, өнеркәсіп, көлік және логистика, денсаулық сақтау, агроөнеркәсіп, энергетика, білім беру мен спорт салаларындағы ынтымақтастық талқыланды. Бұдан бөлек, комиссия мүшелері екі ел арасындағы 2009-2016 жылдарға арналған экономикалық ынтымақтастықтың бағдарламасын іске асыру бойынша 2012-2013 жылдарға негізделген бірлескен іс-шаралар жоспарын орындау барысын қарастырды.