Қазақстанда 2007-жылдан бастап ІD – карталар мен электронды төлқұжат қолданысқа енгізіледі

АСТАНА. 13-шілде. Kazakhstan Today. Қазақстанда 2007-жылдан бастап ІD – карталар мен электронды төлқұжат қолданысқа енгізіледі. Бұл мәселе осы аптада үкіметте премьер-министр Даниал Ахметовтың төрағалық етуімен Ұлттық идентификациялық жүйені қалыптастыру мәселелері бойынша өткен кеңесте талқыланды. Кеңесте үкімет басшысы қазір еліміздің азаматтары мемлекеттік қызметті алу үшін біртұтас құжаттар топтамасын (жеке басының куәлігін, төлқұжатын, салық төлеушінің тіркелу номері және әлеуметтік жеке код сынды) пайдалануға мәжбүр болып жүргенін атап көрсетті. Ұлттық идентификациялық жүйені енгізу бұл тізімді екі құжатқа – ІD – картасы мен өмірбаяндық сипаттамасы бар электронды төлқұжатқа дейін қысқартуға мүмкіндік береді. Соңғысын азаматтар шекарадан өту үшін ғана пайдаланатын болады. ІD карта – электронды чип бар жеке басының куәлігі, онда куәлік иесі туралы барлық деректер мазмұндалады.

ҚР Ақпараттандыру және байланыс агенттігінің төрағасы Асқар Жұмағалиев жиналғандарға құжаттардың үлгілерін ұсынды. Ол сондай-ақ Ұлттық идентификациялық жүйені жасау бағдарламасының жобасы туралы айтты. Оның сөзіне қарағанда, ІD-картасы қазірдің өзінде әлемнің 110 елінде, ал электронды төлқұжат 85 мемлекетінде пайдаланылуда.

Премьер-министр бағдарлама жобасын тұжырымды түрде мақұлдады. Ол биылғы тамыз айында үкімет отырысының күн тәртібіне енгізілетін болады. Даниал Ахметов Ұлттық идентификациялық жүйені енгізу үшін қажетті шараларға бағалау жүргізуге тапсырма берді.