Индустрия және инфрақұрылымдық даму министрі Қайырбек Өскенбаев А4 қағазының қымбаттауына қатысты түсініктеме беріп, елде қағаз тапшылығы болмайтынын мәлімдеді, деп хабарлайды Caravan.kz медиа порталы Sputnik Қазақстан-ға сілтеме жасап.
"Менің ойымша, Қазақстанда тапшылық болмайды. Біз қазір қағазды сырттан әкелеміз. Негізгі жеткізуші Ресей – 61 процент, кейін Түркия мен Қытай. Қажет болған жағдайда, біздің бизнес құрылымдар тез арада шешімін табады деген ойдамын. Егер қандай да бір кедергі туындаса, бізде қағаз жеткізу үшін баламалы бағыттар жетерлік", — деді Өскенбаев үкімет кулуарында.
Айтуынша, Қазақстанда қағаз кесу өндірісі бар.
"Яғни қағаз орамдары сырттан тасымалданады, мұндай екі зауыт бар. Ал шикізатты осы елдерден жеткіземіз", — деді министр.
БАҚ өкілдері дүкендерде кеңсе қағазының бағасы шарықтап кеткенін атап өтті. Өскенбаев құзырлы органдар тексеріс жүргізетінін айтты.
"Баға неге көтеріліп кеткенін білмеймін. Кеше ғана менің тапсырмам бойынша Abdi-ге кірдік. Егер олар 3 мың теңгеден сатып жатса, басқалары бес мыңға дейін көтерген. Бірақ бүгін таңертең маған Abdi де бағаны өсіріп жібергенін хабарлады. Тиісті органдар қайта тексеретін шығар", — деді министр.