Олар 2012 жылғы Лондон Олимпиадасы және Әлем чемпионаты сынды жарыстарға төреші ретінде қатыса алады. Бұл туралы бүгін елордада ҚР Бокс федерациясының президенті Тимур Құлыбаев мәлім етті.
«Төрешілер корпусын дамытуға күш салғанымыз өте маңызды. Біздің 5 төреші 3 жұлдызға ие болды. Бұл — АИБА-ның төрешілерге беретін ең жоғары дәрежесі, енді олар жоғары деңгейлі халықаралық жарыстарға төрелік ете алады. Соның ішінде Әлем біріншілігі мен 2012 жылғы Жазғы Олимпиада ойындарына да қатыса алады»,-деді Т. Құлыбаев.
Федерация басшылығының атап көрсеткеніндей, қазақстандық төрешілер әлемдік додаларда өздерін өте білікті мамандар ретінде көрсетіп жүр. Бұл — спортшылардың әділ ойын көрсетулеріне, республикалық құрамаға ең лайықты боксшыларымызды іріктеуге, үлкен биіктерден көрінуге жол ашады.
Т. Құлыбаевтың айтуынша, федерация отандық төрешілерге материалдық болсын, әдістемелік жағынан болсын қолдау көрсетуін жалғастыра беретін болады.
