Бұл туралы сөз бостандығын заңнамалық реттеу бойынша өткен конференцияда ҚР Инвестициялар және даму министрлігі Байланыс, ақпараттандыру және ақпарат комитеті төрағасының орынбасары Талғат Қанағатов айтты.
«Бүгінгі заманның талабын ескере отырып, мемлекет отандық дәстүрлі бұқаралық ақпарат құралдарын ғаламтор кеңістігіне шығару жұмыстарын қолға алған. Мәселен, 2014 жылы «Қазтелерадио» базасында арнайы жоба іске қосылып, жоба аясында ғаламдық жүйе бойынша 20-ға тарта отандық арналар таратыла бастады. Сонымен қатар, мемлекет отандық баспасөздің де өз интернет ресурстарын ашуына қаржылай да, техникалық та көмек көрсетуде. Осы жылдың аяғына дейін 400-ге жуық газеттің интернет нұсқасы жасалады. Ал 2016 жылдың соңында барлық баспа БАҚ түрлері интернет желісіне шығарылады», — деді ол.
