ІІІ Азия кубогы мен «ҚР Президенті кубогы» ХІХ Халықаралық турнирін сәтті бастады. Жарыстың алғашқы күні «А» тобындағы екі ойын да 3:0 есебімен аяқталды. Онда алдымен тайландтықтар корейлерді, одан кейін қазақстандықтар тайпейліктерді ойсырата ұтып, алғашқы 3 ұпайға қол жеткізді. Ал «Б» тобындағы командалардан вьетнамдықтар ирандықтарды 3:1, қытайлықтар жапондықтарды 3:0 етіп ұтты.
Бүгін Иран мен Жапония, Тайланд пен Тайпей, Корея мен Қазақстан, Вьетнам мен Қытай командалары кездеседі. Александр Гутор жаттықтыратын қазақстандықтардың бүгінгі қарсыласы FIVB рейтингінде 11 орында тұрған 2011 жылғы Азия чемпионатының қола жүлдегері саналатын Оңтүстік Корея құрамасы. Олар 1976 жылғы Олимпиада ойындарының қола жүлдегері және Әлем чемпионатының 2 дүркін қола, Азия чемпионатының 6 дүркін күміс, 7 дүркін қола жүлдегері, Азия кубогының 2008 жылғы күміс, 2010 жылғы қола жүлдесі мен 1997 жылғы Әлемдік Гран-при додасының қола жүлдесін иеленген команда.
