Қазақстандық жағажай волейболшылары Азия чемпионатында сәтті өнер көрсетуде

Қазанның 21-де жалауын көтерген бұл байрақты бәсекеде ел намысын ерлер арасында да, әйелдер арасында да екі-екі жұптан қорғаған болатын. Жалпы бұл дүбірлі додаға ерлер арасында — 26, әйелдер арасында 23 жұп қатысуда.

Василий Кушталов жаттықтыратын әйелдер құрамасынан Татьяна Машкова мен Ирина Цимбалованың жұбы бүгін Вануатудан келген құрдастары Миллер Элвин мен Латика Хенриеттені ( Miller Elwin- Iatika Henriette) ұтты (2-1). Олардың командалас серіктері Инна Рахматулина мен Людмила Исаева тайландтық Тенпакши Уса мен Саннок Жаруниге (Tenpaksee Usa-Sannok Jarunee) 0-2 есебімен есе жіберді. Ал ерлер арасындағы Алексей Сидоренко мен Александр Дьяченко жұбы ирандық Ассари Реза мен Рахманнан (Assari Reza-Rahman) 2-1 есебімен басым түсті. Сондай-ақ Дмитрий Яковлев пен Алексей Кулешов шри-ланкалық Махеш-Васанта ( Mahesh-Wasantha) жұбын 2-0 етіп ұтты. Қазіргі уақытта Машкова-Цимбалова және Сидоренко-Дьяченко мен Яковлев-Кулешов ширек финалдық ойындарын өткізіп жатыр.