«Егер Құдайым ауа райын берсе, маусымның 15-нен 16-на қараған түні тамаша Ай тұтылуы болады. Бұл тұтылу ерекше. Біріншіден, ол Қазақстанда түні бойына көрінеді. Екіншіден ол толық болады. Ай Жердің көлеңкесінің ортасымен өтеді», — деді В. Тейфель.
Айдың тұтылуы 0:22 сағатта басталады. Толық фазасының басталуы 1:22 сағатқа тура келеді. Максимумы – 2:12 сағат, Айдың Жер көлеңкесінен шыға бастауы 3:03 сағатта, толығымен шығуы 4:02 сағатқа тура келеді.
«Ай тұтылуының басында Ай күңгірттенеді. Ол Жер көлеңкесіне кіре бастағанда «айдың дискісі мүжіле» бастайды. Ай толығымен көлеңкеге кірген кезде, айдың қараңғы жағы да аздап жарық болып тұрғаны байқалады», — деді В. Тейфель.
Оның айтуынша, Ай тұтылуы кезінде ғылыми зерттеулер жүргізілетін болады.
«Ай Жердің көлеңкесіне кірген уақытта қаншалықты толық болатыны қызық. Осы кезде айдың жиегі көгілдірлеу болады. Ол Жер атмосферасында жарықтың бұрылуынан. Одан соң Ай толығымен көлеңкеге кіреді де, әлсіз жарығы бар күңгірт-қызыл дискі сияқты болады. Оның жарықтығы Жер атмосферасының шаңдылығына байланысты болады. Жер атмосферасы жанартаулардың атқылауынан пайда болған шаң-тозаңдармен күңгірттеніп тұруы мүмкін», — деді В. Тейфель.
Бұрын хабарланғандай, 10-шы желтоқсанда 2011-ші жылғы екінші Ай тұтылуы болады. Ол 18:45-те басталады.