Ақшаның жоқтығынан бір күн бойы тамақсыз жүруге мәжбүр болған қазақстандықтардың үлесі 1,3 пайызға дейін өсті, — деп хабарлайды Tengrinews.kz тілшісі Energyprom.kz сайтына сілтеме жасап.
Ұлттық статистика бюросы наурызда жүргізген "Халықтың өмір сүру сапасы" зерттеуінің нәтижесі бойынша ақшаның аздығынан азық-түлік жетпей қалады деп қорқатын респонденттер үлесі 5,7 пайыз болған. Өткен жылдармен салыстырғанда бұл көрсеткіш төмендеген (2021 жылы — 6,6 пайыз, 2019 жылы — 7,1 пайыз). Сонымен қатар, бұл сұраққа жауап беруге қиналғандар үлесі бір жылда 3-тен 4 пайызға дейін өскен.
Сонымен қатар, кейінгі бір жылда ақша тапшылығына байланысты бір күн бойы тамақсыз жүруге мәжбүр болған респонденттер үлесі бір жылда 0,5-тен 1,3 пайызға дейін өскен. Респонденттердің тағы 2,6 пайызы жауап беруге қиналған.
Қалада ауылдық жерлерге қарағанда (5,9 пайыз) азық-түлікке қаражат тапшылығы көбірек алаңдатады. Оған әйелдер көбірек алаңдайды — 6,2 пайыз.
Қызметкерлер арасында респонденттердің 5,5 пайызы ақшаның немесе басқа ресурстардың жетіспеуіне байланысты азық-түлік тапшылығына алаңдайды, ал жұмыссыздар арасында — әрбір оныншы респондент.
Қаржы тапшылығынан аштықты сезгендер арасында жұмыссыздар басым — 4,1 пайыз. Жас тобы бойынша 39 бен 48 жас аралығында — жоғары.
Биылғы маусым қорытындысы бойынша, азық-түлік бағасы бір айда 1,9 пайызға өссе, жыл басынан бері бірден 15,7 пайызға қымбаттаған. 2021 жылдың маусымымен салыстырғанда азық-түлік бағасы бірден 19,2 пайызға өскен.
