«Егемен Қазақстан» газетінде «Демократия дамуының жаңа деңгейі» тақырыбымен бүгін жарияланған мақалада Қазақстан Республикасы Конституциялық Кеңесінің Төрағасы Игорь Рогов Қазақ елінің аталмыш бағыттағы жетістіктеріне егжейлі-тегжейлі тоқталды.
— Үстіміздегі жылы Қазақстанның құқық қорғау саласында, ең кем дегенде, екі ірі оқиға болды. 13 наурызда Мемлекет басшысы «Қазақстан Республикасының Құқық арқылы демократия үшін Еуропалық Комиссиядағы (Венеция комиссиясындағы) мүшелігі туралы» Жарлыққа қол қойды. Мемлекет басшысының бұл актісі Қазақстанның тиісті өтінімін қанағаттандыру туралы Еуропа Кеңесі Министрлер Комитетінің шешімінен кейін қабылданды, ал бұл Қазақстанның құқық үстемдігін нығайту саласындағы жетістіктерін халықаралық қауымдастық мойындағанын білдіреді.
12 қарашада Нью-Йорк қаласында БҰҰ Бас Ассамблеясының 67-сессиясы барысында БҰҰ-ның Адам құқықтары жөніндегі кеңесінің 2013-2015 жылдарға арналған жаңа мүшелерін сайлау болып өтті. Осы сессияда Кеңес құрамына барлығы болып жаңа 18 мүше ел, солардың қатарында Қазақстан да сайланды. Бұл шешім адам құқықтарының мызғымастығы мен үстемдігін қамтамасыз етудегі еліміздің жетістіктерін сөзсіз айғақтайды.
Тәуелсіздігіне қол жеткізген күннен бастап-ақ Қазақстан қоғамы әрбір тұлғаның құндылық екенін түйсіну, оның қадір-қасиетін мойындау және қорғау, адамның айырылмас құқықтары мен бостандықтары идеясын орнықтыру бағытында дамып келеді.
Конституцияның 1-бабында Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, адам және адамның өмірі, құқықтары мен бостандықтары оның ең қымбат қазынасы болып табылады деп баян етілген. Негізгі Заңның әлеуетін мейлінше аша түсу жөніндегі Мемлекет басшысының нақты тапсырмасы арқасында, осы жылдары адам құқықтары мен бостандықтарын қорғау саласында аз шаруа тындырылмады.
Тәуелсіз сот жүйесі дамып, үнемі жетілдіріліп отырды. Адам құқықтары жөніндегі уәкіл институты құрылып, оның қызметі мемлекеттік құқық қорғау механизмдерін толықтырып келеді. Қазақстан адам құқықтарын қорғау саласындағы бірқатар халықаралық әмбебап актілерге қосылды. Айта кетерлігі, олардың ішінде ең біріншісі — Бала құқықтары туралы конвенция. Бертін келе Қазақстан Азаматтық және саяси құқықтар туралы, Экономикалық, әлеуметтік және мәдени құқықтар туралы халықаралық пактілерді, БҰҰ-ның Сыбайлас жемқорлыққа және трансұлттық ұйымдасқан қылмысқа қарсы күрес туралы конвенциясын ратификациялады. Адам құқықтарын қорғау саласындағы бірқатар екіжақты халықаралық әмбебап актілер, солардың ішінде Геноцид қылмысының алдын алу және ол үшін жазалау туралы, нәсілдік кемсітушіліктің барлық нысандарын жою туралы, кепілге алуға қарсы күрес туралы, азаптауларға және басқа да қатыгез, адамгершілікке жатпайтын, ар-намысты қорлайтын іс-әрекеттер мен жазалау түрлеріне қарсы, сондай-ақ тағы басқа конвенциялар қолданыстағы құқық жүйесіне қосылды. 2008 жылы Қазақстан Азаптауларға және басқа да қатыгез, адамгершілікке жатпайтын және ар-намысты қорлайтын іс-әрекеттер мен жазалау түрлеріне қарсы конвенцияға Факультативтік хаттаманы ратификациялады. Бұл құжат жоғарыда айтылған адамгершілікке жат іс-әрекеттердің алдын алу мақсатында, бас бостандығынан айрылған адамдар отырған жерлерде тәуелсіз халықаралық және ұлттық органдардың үнемі болуы жүйесін құруды көздейді.
Қазақстан Кеңес жұмысына үнемі қолдау білдіріп, БҰҰ-ның басқа да құқық қорғау құрылымдарымен белсенді түрде ынтымақтасып келеді. 2010 жылғы ақпанда Қазақстан Кеңестің жаңа құқық қорғау механизмі — Әмбебап мерзімді шолу шеңберінде өзінің алғашқы ұлттық баяндамасын сәттілікпен қорғап шықты.
Қазақстанда адам құқықтарын қорғау саласында қол жеткізілген жетістіктерді халықаралық сарапшылар мойындайды. Осы орайда, біздің еліміз адам құқықтарының жай-күйі бойынша халықаралық құқық қорғау құрылымдарының алдында ақталумен ғана шектеліп, «қорғаншақтап» келген уақыттар келмеске кетті деп ашық айтуға болады. Енді біз кемшіліктерді жоя білетін ғана емес, өзге елдер үшін үлгі де бола алатынымызды танытуға дайынбыз.
Енді Кеңеске келер болсақ, ол 2006 жылғы 15 наурызда Адам құқықтары жөніндегі комиссияның орнына құрылып, адам құқықтарын қорғау саласындағы халықаралық жетекші орган болып табылады. Ол Біріккен Ұлттар Ұйымы жүйесінде адамның жер жүзінде жалпыға бірдей құрметтелуіне және оның барлық құқықтары қорғалуына қолғабыс етуге және адам құқықтары бұзылуымен байланысты жағдайлардың қаралуына, сондай-ақ тиісті ұсынымдар дайындалуына жауапты үкіметаралық орган болып табылады.
Кеңестің құзыретіне адам құқықтары саласындағы барлық өзекті тақырыптар мен жағдайларды талқылау жатады. Кеңес Біріккен Ұлттар Ұйымына мүше 47 мемлекеттен тұрады, оларды БҰҰ-ның Бас Ассамблеясы сайлайды. БҰҰ-ға мүше барлық мемлекет Кеңеске мүше бола алады. Олардың әрбірін Бас Ассамблея мүшелері көпшілік дауыспен тікелей жасырын дауыс беру арқылы сайлайды. Осылайша шеттен қандай да болсын тәсілмен ықпал етуге жол берілмейді.
Кеңес мүшелері географиялық жағынан әділетті өкілдік ету қағидасы бойынша сайланады және өңірлік топтар арасында мандаттар былайша таратылады: африкалық мемлекеттер тобы — 13 орын; азиялық мемлекеттер тобы — 13 орын; шығысеуропалық мемлекеттер тобы — 6 орын; Латын Америкасы және Кариб бассейні мемлекеттерінің тобы — 8 орын; батысеуропалық және өзге де мемлекеттер тобы — 7 орын. Қазақстан азиялық мемлекеттер тобына жатқызылған.
Кеңестің штаб-пәтері Женева қаласында орналасқан, ол бір жыл ішінде өзінің отырысына мерзімімен жиналып отырады. Бұл сессиялардың жалпы ұзақтығы он аптадан кем болмайды.
Кеңес өзіне Бас Ассамблея берген мандаттарға сәйкес, Адам құқықтары жөніндегі Жоғарғы комиссардың басқармасынан бөлек, өз алдына дербес орган болып табылады. Дегенмен, АҚЖҚБ Адам құқықтары жөніндегі кеңестің отырыстары мен жиналыстары өткізілуін қамтамасыз етеді, арнайы ресімдерге қызметкерлерін қатыстырып, материалдық-техникалық қамсыздандыру, зерттеу жұмыстарын жүргізу түрінде қолғабыс етеді. Жоғарғы комиссар Кеңестің сессияларына қатысып, адам құқықтары бойынша әлемдегі жағдайға үнемі шолу жасайды.
БҰҰ-ның жарғылық органы болып табылатын Кеңеске қарағанда, Адам құқықтары жөніндегі комитет келісім-шарт негізінде құрылған орган болып табылады. 2009 жылы Қазақстан Азаматтық және саяси құқықтар туралы 1966 жылғы 19 желтоқсандағы халықаралық пактіге Факультативтік хаттамаға қосылды және сол арқылы БҰҰ Адам құқықтары жөніндегі комитетінің мемлекеттік билік органдары қабылдаған актілер немесе шешімдер бойынша олардың іс-әрекеті мен әрекетсіздігіне қатысты, Қазақстан Республикасының юрисдикциясына жататын, жекелеген тұлғалардың хабарлауын қабылдау және қарау құзыретін мойындады. Қазіргі уақытта біздің еліміз атынан бұл Комитетке белгілі заңгер-ғалым, заң ғылымдарының докторы, Қазақстан Республикасы Орталық сайлау комиссиясының мүшесі М.Сәрсембаев мүше болып табылады.
Кеңеске мүше болу қосымша міндет жүктейді. Енді Қазақстан адам құқықтары туралы жоғарыда аталған және өзге де халықаралық актілердің басқа елдердің, соның ішінде біздің республикамыздың да ұлттық заңнамасына енгізілу үрдісін бақылап отырады. Сондықтан, біреуге баға беруден бұрын, өзің биік талап деңгейінен шығуың керек.
Кеңес мүшелерін сайлау кезінде үміткерлердің адам құқықтарын қорғау ісіне қалай үлес қосқаны және осы мақсатта ерікті жарна жасап, өзіне қандай міндеттер қабылдағаны ескеріледі. Өз қызметінде Кеңес мүшелері адам құқықтарын көтермелеудің және қорғаудың ең жоғары стандарттарын қолдауға тиіс. Бас Ассамблея отырысқа қатысып, дауыс беріп отырғандардың үштен екі көпшілік даусымен, адам құқықтарын жүйелі әрі көпе-көрінеу түрде бұзып отырған қандай да бір елдің Кеңеске мүшелігін тоқтата алады.
Кеңеске мүше болу үлкен жауапкершілік жүктейді және елдің құқық қорғау жүйесін одан әрі жетілдіру бойынша кешенді шараларды қолға алуды қажетсінеді. Өзін мүшелікке қабылдау туралы өтінішті бере отырып, Қазақстан осы саладағы реформаларды одан әрі жалғастыруға бел буа кіріскенін аңғартты. Қазір Президент тапсырмаларына сәйкес Қазақстанда жүргізіліп жатқан демократиялық жаңғыртулар аясында, адам құқықтарын ең жоғары құндылық деп тану қағидасын сіңдіру мақсатында, қазіргі заманғы қауіп-қатерлер мен бой көрсетулерге бара-бар жауап ретінде Қылмыстық, Қылмыстық іс жүргізу, Қылмыстық-атқару, Әкімшілік құқық бұзушылық туралы кодекстердің және өзге де заңнамалық актілердің жаңа редакциялары әзірленуде. Бұлардың жобаларында халықаралық құқық қорғау құрылымдарының ұсынымдары мен еліміздің халықаралық міндеттемелері ескеріледі деп ойлаймын.