Қазақстанның оңтүстігіндегі тауларда көшкін түсу қаупі бар

Оңтүстік Қазақстан және Жамбыл облыстарының таулы аудандарында көп мөлшерде ылғал түсуге байланысты 27-28-қаңтар аралығында көшкін түсу қаупі бар. Бұл туралы "Казгидромет" РМК-нің хабарламасына сілтеме жасай отырып ҚР төтенше жағдайлар жөніндегі Агенттігі ескерту жариялады.

Хабарламада атап көрсетілгеніндей, Талас және Оған жоталарында қар көшкіні түсу қаупі тіптен жоғары деп бағалануда.

Осыған байланысты ҚР төтенше жағдайлар жөніндегі Агенттігінің басшылығы облыстық төтенше жағдайлар жөніндегі басқармасы мен «Қазақ селден қорғау» қызметіне, халыққа осы жөнінде хабарлама таратып, адам шығынына жол бермеуге шаралар қолдануды тапсырды.
Атап айтсақ, құтқару қызметінің құрамы мен техникасын дайындық жағдайына көшіру, қамтамасыздық нысандарына тұрақты жұмыс істеуге жағдай жасау, жолдар мен көпірлер ахуалына және көлік қозғалысына бақылауды күшейту, байланыс және хабар тарату құралдарының әзірлік жағдайын тексеру жөнінде тапсырма берілді.