Сондай-ақ, газетте «Сенімнің шырқау биігі» деген тақырыппен Білім және ғылым министрлігі Философия, саясаттану және дінтану институтының директоры, психология ғылымдарының докторы, профессор Зарема Шәукенованың мақаласы берілген.
Үстіміздегі жылдың 29 қарашасында Астанада тұңғыш рет «Алғашқы Назарбаев оқулары: «Жаңа әлемдегі жаңа Қазақстан» тақырыбында халықаралық форум өтеді. Қазақстан ғалымдары алдағы оқиғаға үлкен рухани өрлеу үстінде дайындалып жатыр. Осы орайда аталған мақалада ұлттық идея мен идеологияны қалыптастырудағы Көшбасшының рөлі туралы сөз болады.
«Президенттің саясаты тарихи әділеттілікті қалпына келтірді. Қазақ этносының титулды ұлт, қазіргі Қазақстан аумағының мұрагері ретіндегі рөлі мен құқы орнықтырылды. Осымен бір мезгілде, Қазақстан басшылығы ұтымды ұлттық саясат жүргізуінің нәтижесінде Қазақстандағы этностарды үйлесімді түрде, зорлық-зомбылықсыз топтастыра алды. Қазақ тілінің мемлекеттік мәртебе алуы осының маңызды индикаторы болды. 2020 жылға қарай Қазақстан мектептерінің барлық түлектері қазақ тілін меңгеріп шығады», — дейді автор мақаласында.
***
«Айқын» газетінің бүгінгі санындағы «Жүректің көзі» айдарында жазушы, Мемлекеттік сыйлықтың иегері Әнес Сараймен арадағы сұхбат «Арманым жоқ деуіме болады» деген тақырыппен беріліпті. Сұхбатта жетпістің бесеуіне шығып отырған жазушы өткен өміріне шегініс жасап, өз ойларымен оқырман қауыммен бөліседі. «Жетпіс бес жыл өмір сүру оңай емес. Біз халықтың басындағы қиын кезең өтіп жатқан 1937 жылы туғандармыз ғой. Осы жылы туған 15-ке жуық жазушы бар едік бір кездерде. Бүгін солардан Қайрат Жұмағалиев екеуіміз ғана 75-ке жетіп отырмыз. Демек, осы өмірдің өзін жүріп өту оңай шаруа болмағаны да. Соның өзі ойға қалдырады. Біз соғыс балаларымыз ғой. Соғыс балаларының басынан аз тауқымет өткен жоқ. Әйтеуір анамыздың жалғыз тұяқ деп алақанына салып, өсіргенінің арқасында аман қалдық», — дейді жазушы.
Сондай-ақ, осы газетте «Олақ одақ осылайша опынып отырмайық» деген тақырыппен Кедендік одаққа қатысты мақала жарияланды. «Бұл — теңдіктің одағы емес, кемдіктің одағы. Бұл одақ о бастан тең құқылы емес-тін. Үшінші елдерден келетін импорттың көмегімен, Ресей бөліп берген кеден баж салығынан түсетін бюджеттік түсімдердің негізінде Қазақстан қазіргі уақытта Кеден одағына қосылудан пайда көріп жатыр деп қорытынды жасау қиын» — делінген мақалада.
Автор Кедендік одақтың барлық тетіктері іске қосылғаннан бері Қазақстан, Ресей мен Беларусь елдері арасындағы экономикалық ықпалдастық күшейе бастағандығын айта келіп, кез келген мемлекет экономикалық дамуды көздесе, өз ұпайын түгендеуге бағыт ұстау тиіс екендгін тілге тиек етеді. Алайда Кедендік одақтың күнгейінен көлеңкелі тұстары әлі көп. Бірақ одақ ішінде әлі күнге дейін шешілмей жатқан мәселелер бар. Ең бастысы, мемлекеттік органдар мен кәсіпкерлер арасында нақты байланыс жоқ дей келе, автор біздің кәсіпкерлерлер тауар сертификатын екі рет алып, қосымша құн салығын екі есе артық төлеуге мәжбүр болып отырғандығын айтады. «Ресейде — 18 пайыз, ал Қазақстанда — 12 пайыз, барлығы 30 пайызға шығып отыр. Бұл — үлкен шығын. Осының салдарынан елімізде тауар қымбатшылығы басталды. Кеден тарифтерінің кесірінен пайда болған қымбатшылықты Қазақстан азаматтары төлеп отыр. Қазақстан орташа мерзімді кезеңде, 2015 жылға дейін Кеден одағына қосылудан ұтыла береді. Ұзақ мерзімді мүмкіндіктер қазіргі сәтте бұлыңғыр көрінеді, себебі о бастан бұл одақтың экономикалық сипатынан гөрі саяси сипаты басым» — дейді газет.
