Жарияланды: 530

ҚХА саяси қуғын-сүргін құрбандарын еске алуға арналған шаралар өткізеді

Бүгін Қазақстан халқы Ассамблеясы «Тарихтан тағылым, өткенге тағзым: АЛЖИР - КарЛАГ» атты халықаралық жоба аясында «АЛЖИР» мұражай-мемориалдық кешенінде саяси қуғын-сүргін құрбандарын еске алуға арналған шаралар өткізеді.

Бұл туралы аталған ассамблеясының баспасөз қызметінен хабарлады. Қуғын-сүргінге ұшырағандар ұрпақтарымен кездесу «дөңгелек үстел» аясында ұйымдастырылады. Оған «АЛЖИР-дің» тұтқыны болған - Л.М. Френкельдің немересі Дарья Виолина, «ГУЛАГ-тың» тұтқыны болған С.Павловскийдің ұрпағы, «РИСК» кинокомпаниясының режиссеры (РФ, Мәскеу) Сергей Павловский, қуғын-сүргінге ұшыраған азаматтың немересі, Ақмол селолық округі әкімінің орынбасары Айгүл Сейітжанова, «АЛЖИР» тұтқынының ұрпағы Александр Тайғалинов, қуғын-сүргінге ұшыраған азаматтың қызы Күлпаш Қапанқызы Мұхамеджанова, қуғын-сүргінге ұшыраған азаматтың немересі Перизат Садуақас бар. Кездесуге Қазақстан халқы Ассамблеясының мүшелері, Парламент депутаттары, ғалымдар мен зерттеушілер, мемлекеттік органдар, шығармашылық интеллигенция өкілдері, мұражай және мұрағат қызметкерлері қатысады. Саяси қуғын-сүргін құрбандарына арналып Еске алу қабырғасына гүл шоғын қою, үнсіздік сәті және митинг өтеді. Қатысушылар мен шақырылғандар үшін мұражай-мемориалдық кешенде экскурсия ұйымдастырылады. Қасірет қақпасында Қазақстан халқы Ассамблеясының қолдауымен «Тарихтан тағылым - өткенге тағзым: АЛЖИР - КарЛАГ» атты автошеруді бастауға арналған митинг өтеді. 30-31 мамырда, екі күн бойы оған қатысушылар шеру бағытымен жүріп өтіп, Астана қаласында «Қазақстан» Орталық киноконцерт залында «Жерұйық» көркемфильмінің тұсаукесеріне қатысады. Сондай-ақ Осакаровка ауылының тұрғындарымен кездесіп, Долинка ауылында және Спасскі мемориалдық кешенінде еске алу шараларын өткізеді. Е.Бөкетов атындағы Қарағанды мемлекеттік университетінде өтетін «Тарихтан тағылым - өткенге тағзым» атты ғылыми-тәжірибелік конференцияға қатысады.

Пікір қалдырыңыз

Пікір қалдыру тіркелген пайдаланушылар ғана мүмкін

Закрыть