«Қазақстанда 1 тамыздан бастап байланыс операторлары үшін Интернет тарифі орта есеппен екі есеге арзандайды. Бұл жөнінде Twitter-дегі жеке парағында Байланыс және ақпарат министрі Асқар Жұмағалиев мәлімдеді», — делінген «Егемен Қазақстан» газетінің бүгінгі нөміріндегі «Екі есе арзандайды» деген тақырыппен берілген мақалада. А. Жұмағалиевтың айтуынша, «Қазақтелеком» 1 шілдеден бастап Megaline тарифтік жобаларының жылдамдығын арттырады. Ал 1 тамыздан бастап байланыс операторлары үшін Интернеттің шекті тарифтері орта есеппен екі есеге арзандатылатын болады.
«Кеңестік кезеңде Ресейге ұзақ жылға жалға берілген Тайсойған әскери сынақ алаңы ауданның ең шұрайлы аумағында орналасқан. Ауданның шұрайлы жерін алған ресейліктер сол жылдары ауыл тұрғындарының шырайын да бірге әкетті… Бір жылдың ішінде бірнеше зымыранның қалдықтары құлап, тереңдігі бес жүз метрге дейін жеткен әскери сынақтың зардабы күні бүгінге дейін тұрғылықты жердегі адамдардың денсаулығы мен төрт түлік малға зардабын тигізіп отырғаны осының айқын дәлелі». Осы айтылған мәселемен танысқыңыз келсе «Айқын» газетінің бүгінгі нөмірінде жарияланған «Тайсойған тұрғындары зымыранның зардабын тартып отыр» деген тақырыппен берілген мақалаға көз жүгіртіңіз.
«Қорымды қорлағандарға үкім шықты». «Айқын» газетінің бүгінгі санында осындай тақырыппен мақала басылды. «Атырауда зираттарды қиратып қана қоймай, жерленген мәйіттің жанына жатып, өлім мен о дүниенің жұмбағын сезінбекші болғандарға қатысты қозғалған қылмыстық іс сотқа жетіп, үкім шықты», — делінген мақалада.
«Алаш айнасы» газетінің бүүінгі нөмірінде «Орташа өмір сүру жасымыз орташаға жетпей тұр» деген тақырыппен мақала басылды. Мақалада Қазақстан халқының орташа өмір сүру ұзақтығын басқа елдермен салыстыру «ұяттылау» екендігі айтылады. «ҚР Статистика агенттігінің мәліметтеріне сүйенсек, 2009 жылы қазақстандықтардың орташа өмір сүру ұзақтығы бойынша күтілген көрсеткіш 68,6 жас болса, 2010 жылы 68,41 жас болған. Алайда, шындығында, бұл көрсеткіш 67,87 жасты құраған. Нәтижесінде еліміз өмір сүру ұзақтығының деңгейі бойынша әлем елдерінің арасында 152-орында тұр», — делінген мақалада.
«Алаш айнасының» бүгінгі санында сондай-ақ «Шоқайдың Шиелі мен Берлинге дейінгі тағылымы жарық көрді» деген тақырыппен мақала басылды. «Алматыда Алаш арыстарының бірі, қазақтан шыққан саяси эмигрант Мұстафа Шоқайдың өмір жолы, еңбегі, тарихи мұрасы, өмір сүрген дәуірі туралы «Мұстафа Шоқайдың жолымен» атты деректі фильмнің тұсаукесер рәсімі өтті», — делінген мақалада.
«Казахстанская правда» газетінің жазуынша, кеше Елбасы Нұрсұлтан Назарбаев Астанадағы «Гранд Астана» тұрғын үй кешені мен сол жағалаудағы «BI Village» коттеджді тұрғын үйлер алабын аралады. Президент проблемалық нысандардың құрылысымен және «АҚҚБ «Жаңа құрылыс» ЖШС үлескерлерді тұрғын үйлермен қамту барысымен танысты. Елбасы «Қуат» құрылыс корпорациясы бастап салған үйлердегі үлескерлер өздеріне тиісті үйлерді алатынына көзі жеткенін атап өткен.
