ҚР ІІМ Алматыдағы сәулетті үйлерге қарақшылық шабуыл жасауды кәсіпке айналдырған тұрақты қылмыстық топты құрықтау шарасын жүзеге асырды

ҚР ІІМ-нің ұйымдасқан қылмыспен күрес жөніндегі оңтүстік аймақтық басқармасы Алматыдағы сәулетті үйлерге қарақшылық шабуыл жасауды кәсіпке айналдырған тұрақты қылмыстық топты құрықтау шарасын табысты жүзеге асырды. Бұл туралы бүгін, 24-қарашада ҚР ІІМ-нің баспасөз қызметінен хабарлады.

Баспасөз қызметінің ақпаратына сәйкес, тұтқындау шарасы 23-қарашаға қараған түнде жүзеге асырылды. Операцияға «Сұңқар» тобы, ҚР ІІМ-нің ұйымдасқан қылмыспен күрес жөніндегі оңтүстік аймақтық басқармасының оперативтік топтары мен ҚР ІІМ-нің аса қауіпті қылмыстармен күресті үйлестіру орталығының қызметкерлері қатысты.

Бес қылмыскер Таугүл ауылында Германия азаматы жалдап тұратын жеке меншік үйге қарақшылық шабуыл жасамақшы болып жатқан жерінен қолға түсті. Ұсталғандардан 9 оғы бар ПМ тапаншасы, екі аңшы пышағы, газ баллоны, пластик терезелерді жағуға арналған аспаптар тәркіленді.
ҚР ІІМ-нің ұйымдасқан қылмыспен күрес жөніндегі оңтүстік аймақтық басқармасының мәліметі бойынша, құрықталған қылмыстық топ осыған ұқсас басқа да бірнеше қылмысқа қатысты деген күдік бар.