ҚР Премьері С.Ахметов Николай Азаровты Украинадағы парламенттік сайлауда Аймақтар партиясының жеңісімен құттықтады

Бұл туралы екі премьердің бейсенбі күнгі телефон арқылы сұхбатында әңгіме болды, деп хабарлады ресейлік «Жаңалықтар» агенттігі. Украина үкіметі баспасөз қызметінің мәліметтеріне қарағанда, тараптар украин-қазақ сауда-экономикалық және мәдени ынтымақтастығының бірқатар өзекті мәселелерін талқылады. Екіжақты қатынастардың жоғары деңгейі және сындарлы сипаты атап өтілген. «Қазақстан Премьер-Министрі сондай-ақ Николай Азаровты парламенттік сайлаудағы Аймақтар партиясының сенімді жеңісімен құттықтады және партия бағдарламасын және Украина президентінің саясатын одан әрі жүзеге асыруда табыстар тіледі», - делінген хабарламада. Украинадағы парламенттік сайлау өткен жексенбіде болды. Парламентке сайлау хаттамаларының 99,5 пайызын санағаннан кейін билеуші Аймақтар партиясы 30,04 пайызбен көш бастады, оппозициялық «Батькивщина» - 25,5 пайыз жинады, үшінші болып бокстан әлем чемпионы Виталий Кличконың «УДАР» партиясы келеді (13,94 пайыз), деген мәліметтерді жариялады Украина Орталық сайлау комиссиясы. Төртінші орында - 13,19 пайызбен Компартия, бесінші орында - «Свобода» ұлтшылдары (10,43 пайыз) тұр.