ҚР үкімет басшысының орынбасары А.Есімов Шардара су қоймасындағы ахуалмен танысу үшін Оңтүстік Қазақстан облысына келді

Ал бүгін таңертең А.Есімов Шардара су қоймасында қалыптасқан ахуалмен көзбе-көз танысу үшін тікұшақпен Шымкенттен Шардара ауданына қарай ұшып шықты. Үкімет басшысының орынбасары онда бөгет жағдайымен танысып, мамандармен сұхбаттаспақшы.

А.Есімов Шымкентке келер алдында Бішкекте болып, Тоқтағұл су қоймасынан Сырдарияға су жіберу мөлшерін азайту тұрғысында Қырғызстан жағымен келіссөздер жүргізген болатын.
12-ақпан, бүгінгі жағдаймен, Шардара су қоймасындағы су көлемі 4 млрд. 929 млн. текше метрді құрап отыр. Жобалық мөлшер 5,2 млрд. текше метрге тең. Соңғы екі тәулікте су көлемі 29 млн. текше метрге артты. Су қоймасына қазір келіп жатқан су мөлшері секундына 1586 текше метрді құрайды. Ал 9-ақпанда секундына 1298 текше метр су жіберілген болатын. Су қоймасына жіберілетін су көлемінің шұғыл артуына Тәжікстаннның Қайраққұм су қоймасынан су жіберу көлемін ұлғайтуы әсер еткен. Су тасқынынан алдын ала қорғанған Тәжікстан су қоймасынан екі күнде секундына 1400 текше метр су босатты. Ал бүгін таңертең Қайраққұм су қоймасынан жіберілген су көлемі секундына 850 текше метрге дейін азайтылды.