ҚР үкімет басшысының төрағалық етуімен Мәскеуде ЕурАзЭҚ мемлекетаралық кеңесінің үкімет басшылары деңгейіндегі мәжілісі басталды

«Қазақстан үкімет басшысының ауысуына және ЕурАзЭҚ мемлекетаралық кеңесінің тәртібіне сәйкес Мемлекетаралық кеңес төрағасының орынбасарлық функциясы ҚР үкімет басшысы Даниал Ахметовқа жүктеледі»,- деді отырысты ашып сөз сөйлеген Ресей үкімет басшысы Михаил Касьянов.

Бұдан бұрын да хабарлағанымыздай, Мәжіліс 3-3,5 сағатқа созылады деп күтілуде. Бастапқыда ЕурАзЭҚ-қа мүше мемлекеттердің барлық үкімет басшылары жабық есік жағдайында келіссөздер өткізеді, соңынан оларға үкіметтік делегациялардың мүшелері қосылады. Еліміз өкілдерінің арасында вице-премьер Сауат Мыңбаев, Қазақстанның Ресейдегі елшісі Алтынбек Сәрсенбаев пен бірқатар министрліктердің вице-министрлер деңгейіндегі басшылары бар.
Бүгінгі мәжіліс қорытындысы бойынша ЕурАзЭҚ үкімет басшылары кітапхана ісі саласындағы ынтымақтастық туралы, ЕурАзЭҚ-қа мүше елдер аясындағы біртұтас экспорттық бақылау тәртібі туралы келісімдерге, сондай-ақ, бұған дейін қабылданған келісімдерге өзгертулер мен толықтырулар енгізу жөніндегі екі хаттамаға қол қояды. Атап айтсақ, ЕурАзЭҚ-қа мүше елдер арасындағы сауда-саттықта арнаулы қорғаныс, демпингке қарсы және компенсациялық шаралар қолдану тетіктері туралы хаттама мен жеке тұлғалардың шекарадан тең құқылы әрі еркін өтуіне және олардың тауарлар мен валютаны кедергісіз алып өтуіне жағдай жасау туралы келісімге қол қойылмақшы.
Мәжілістен соң ЕурАзЭҚ-қа мүше елдердің үкімет басшылары кездесуге аккредитация алған журналистерге арнап қысқаша баспасөз мәслихатын өткізеді.