Бұл туралы бүгін ҚР Мемлекеттік хатшысы Гүлшара Әбдіқалықованың төрағалығымен өткен Қазақстан Президенті жанындағы Әйелдер істері және отбасылық-демографиялық саясат жөніндегі ұлттық комиссияның кезекті отырысы аясында БАҚ өкілдеріне Білім және ғылым вице-министрі Тахир Балықбаев айтты.
«Біз қазіргі уақытта анықтаудамыз. Ол жерде жазатайым оқиға орын алған. Студенттер төбелесіп, өкінішке орай 1 студент қаза тапты. Қазіргі уақытта университет басшылығы мән-жайды толығымен анықтауда. Тергеу амалдары жүргізілуде. Мән-жай толық белгілі болғаннан кейін хабарлайтын боламыз», - деді Т.Балықбаев.
Сонымен қатар вице-министр БАҚ өкілдерінің жоғары оқу орны басшысына қатысты қандай да бір шара қолданыла ма деген сауалдарына да жауап берді.
«Әрине, жоқ. Бұл жедел іс-қимыл емес қой. Мән-жай толық анықталғаннан кейін қандай шара қабылдайтындығымызды шешеміз», - деді ол.
Айта кетейік, 30 қараша күні Қ.Сәтбаев атындағы Қазақ ұлттық техникалық зерттеу университетінің бас корпусында 4 курстың екі студенті арасында жанжал орын алған. Ұрыс-керіс барысында бір студент екінші студентке пышақ салып, соның салдарынан жәбірленуші оқиға орнында жантәсілім еткен.