Парламенттің шұғыл отырысы дүйсенбі күні 22 сағатта басталды. Оған тек оппозициялық көзқарастағы депутаттар ғана жиналғандықтан, қажетті кворум қалыптаспады. Жаңа Конституцияны қабылдау үшін отырысқа қатысушылар құрылтай жиналысын құрды. Уақыт кеш болғанына қарамастан, парламенттің жанындағы алаңда 3-4 мың адам жиналды.
Отырыс барысында парламентшілер тобы арнаулы шақырылған конституциялық кеңестің былтыр дайындаған Конституциясының жобасын қабылдауға дауыс берді. Құжатқа 34 депутат қол қойды. Бұл Қырғызстандағы заң шығарушылардың жартысына жетпейді. Қол жинау бүгін 12 сағатқа дейін жалғасады. Құрылтай жиналысына қатысушылар Қырғызстан парламентінің ғимаратында түнеп шықты.
Ал республиканың БАҚ-тарында билік алмасқаннан кейін барлық оппозиционерлер иемденеді делінген мемлекеттік лауазымдардың тізімі жария етілді. Құжатқа сәйкес әзірге тек мәдениет министрі мен әділет министрінің лауазымы ғана бос қалыпты.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
