«Николай Танаев пен оның қорғаушысы Максим Максимович тергеу обьективті өткізілуде деп жұртшылыққа мәлімдегеніне қарамастан, ол үшін үкімет тікелей кепілдік бергеніне қарамастан, Н.Танаев қашуға әрекет жасады»,- делінген бас прокуратура таратқан хабарламада. Осыған байланысты оны қамауға алу шарасы іске асырылды.
Бұл Қырғызстандағы осы аптадағы екінші шулы тұтқындау шарасы. 5-қыркүйек, дүйсенбіде Италиялық Джорджио Фиаккони есімді ірі кәсіпкер ешқайда кетпеу туралы қолхат талабын бұзуға байланысты республикаға қайтадан оралған соң қамауға алынған.
Бұдан бұрын да хабарлағанымыздай, биылғы жылдың маусым айының басында Қырғызстан бас прокуратурасы бұрынғы үкімет басшысын қамауға алуға санкция берген. Бас прокуратура Н.Танаевтың үстінен мансабын асыра пайдалану және бюджет қаржысын заңсыз жұмсау жөніндегі баптар бойынша 3 қылмыстық іс қозғаған.
Биылғы жылдың 25-наурызында отставкаға кеткеннен кейін Қырғызстанды тастап шыққан Н.Танаев тамыздың ортасында республикаға оралды. Осыдан кейін ол бірден бас прокуратураға келіп жауап берді. Бұрынғы үкімет басшысының өз еркімен келуіне байланысты бас прокуратура оны қамауға алу туралы шешімді өзгертіп, одан ешқайда кетпеу жөнінде қолхат алған. Сол кезде Қырғызстанның бұрынғы үкімет басшысы үшін бірнеше парламент мүшелері кепілдік берді.
Н.Танаев Қырғызстан үкімет басшысы лауазымына 2002-жылы Құрманбек Бакиевтің орнына тағайындалған болатын.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
