Қытайдың "Шэньчжоу-5" деп аталатын тұңғыш пилотты ғарыш кемесі осы елдің солтүстігіндегі Ішкі Монғолия автономиялық аймағына қонды

Баспасөз қызметінің ақпаратына сәйкес, ғарыш кемесі жерге оралғаннан кейін ҚХР Мемлекеттік кеңесінің төрағасы Вэнь Цзябао ғарышкерді сапарының сәтті аяқталуымен құттықтады.

ҚХР-ның ұшуларды басқару орталығы ғарыш сапарын табысты өтті деп жариялады.
Орбитада болған мерзімде ғарыш кемесі Жерді 14 мәрте айналып өтті.
Бұдан бұрын да хабарлағанымыздай, 15-қазанда ҚХР өз тарихында тұңғыш рет «Шэньчжоу-5» деп аталатын пилотты ғарыш кемесін ұшырған болатын.
38 жастағы Ян Ли Вэй Қытай тарихына тұңғыш ғарышкер ретінде жазылды. Ғарыш кемесі кеше жергілікті уақытпен 9 сағатта ұшырылған. «Шэньчжоу-5» Қытайдың солтүстік -батыс бөлігінде, Пекиннен 1 мың шақырым қашықтықтағы Гоби шөлінде орналасқан Цзюцюань ғарыш айлағындағы ғарыштық базадан аспан кеңістігіне жол тартты.