Қызылорда облысында 2004-жылы 153 кәсіпорын банкроттық процедурасынан өтті

Қызылорда облысында 2004-жылы 153 кәсіпорын банкроттық процедурасынан өтті. Соның ішінде "мүлкі мен активтері жоқ, салық мекемелерімен байланысын үзген" 98 кәсіпорын "Кәсіпорындарды тарату және банкрот деп жариялау жөніндегі" республикалық бағдарлама аясында таратылды. Бұл туралы KZ-today тілшісіне ҚР қаржы министрлігінің төлем қабілеті жоқ қарыздар кәсіпорындармен жұмыс жөніндегі Қызылорда облыстық басқармасының бастығы Сержан Наметша хабарлады.

Ал 2005-жылы басқарманың реестріне төлем қабілетінен айрылған 235 кәсіпорын енгізілді. Олардың арасында ауылшаруашылығы құрылымдары да бар. Осындай кәсіпорындардың жалпы берешегі 2,8 млрд. теңгені құрайды. 44 кәсіпорын жабылу алдында.

Банкроттық процедурасынан өтушілердің арасында «Береке нан» ААҚ, «Қазалы су құбырлары», «Қызылорда ауданааралық жылу электр орталығы» АҚ сынды аймақтағы танымал кәсіпорындар да бар.
С.Наметшаның айтуынша, «Сирена» ЖШС, «Аяз» ЖШС, «Мақсат» ЖШС тәрізді үш кәсіпорын жетекшілерінің үстінен жалған банкрот деп жариялау деректері бойынша қылмыстық іс қозғалды. Сонымен бірге қазір 10 кәсіпорынға қатысты конкурстық іс жүргізу барысындағы заң бұзушылық материалдары соттарда қаралуда.