Салтанатты шараны облыс әкімі Болатбек Қуандықов ашып, еліміздің намысын абыроймен қорғай білген жерлестерін айтулы жеңістерімен құттықтады.
Осы байрақты бәсекеде қызылордалық спортшылар Қазақстан құрамасының қоржынына 1 алтын және 2 қола медаль қосты. Атап айтқанда, Бейжің Олимпиадасаның жеңімпазы, әлемнің екі дүркін чемпионы ауыр атлет Илья Ильин алтын медальды қанжығыға байласа, келесі ауыр атлет Дәурен Шәутеев пен дзюдошы Ғалия Өлментаева қола медальға қол жеткізді.
— Құрметті спортсүйер қауым, Сыр спортының мақтаныштары, — деді салтанатты шарада облыс әкімі. — Өткен айда Аспан асты елінде өткен бәсірелі бәсекеде Қазақстан құрамасы жоғары жетістіктерге қол жеткізгені баршаға мәлім. Оның ішінде біздің өңірден қатысқан спортшыларымыз биік тұғырларды бағындыра білді. Әрине, бұл сіз бен біз үшін үлкен мақтаныш. Соңғы жылдары Сыр спортында үлкен серпіліс бар. Бұл үкімет тарапынан бұқаралық спортты дамытуға үлкен бетбұрыс жасауының айқын жемісі. Өңірде саланы өркендетуде толағай жұмыстар жасалуда. Атап айтсақ, биыл аймақта көптеген спорт алаңдары пайдалануға берілсе, келер жылы тағы бірқатар спорт кешендері іске қосылады. Бұған қоса, қаладағы Ғ.Мұратбаев және «Локомотив» стадиондары жөндеуден өткізіліп, Арал ауданындағы спорттық-сауықтыру кешені пайдалануға берілді. Жылдан-жылға аймақта ауыр атлетика, дзюдо, бокс, көгалдағы хоккеймен қатар гандбол секілді спорт түрі қарыштап дамып келеді. Сондай-ақ алдағы науқанда премьер-лигаға қатысатын «Қайсар» футбол клубының жаңарған спорт кешенінде жақсы ойын өрнегін көрсететініне бек сенімдіміз. Ендігі кезекте саңлақтарымыздың әлем елдері көз тіккен еліміздің бас қалалары Алматы мен Астанада өтетін қысқы Азиада және Лондонда болатын Олимпиада ойындарында көк туымызды биікте ұстап, бүгінгідей жетістіктерімен оралуына тілектеспіз.
Сөзінің соңында облыс әкімі облыс туын көкке көтерген спортшылар мен жаттықтырушыларды марапаттады. Рәсімде Илья Ильинге 1,5 млн., қола жүлдегерге 450 мың теңгеден сертификат табыс етті. Облыс ауыр атлетикасын өркендетуге үздіксіз үлес қосып жүрген ҚР еңбек сіңірген жаттықтырушысы Вилорий Пак 750 мың, дзюдодан ҚР еңбек сіңірген жаттықтырушы Ишанбек Жұмабаев пен ауыр атлетика бапкері, ҚР спорт шебері Евгений Пя 300 мың теңгеден сыйақы алды.
Соңынан спорт саңлақтары өздеріне жасалып жатқан құрмет пен қамқорлық үшін алғыс сезімін жеткізді.
