Бұл туралы Caravan.kz медиа порталы ҚазАқпарат-қа сілтеме жасап хабарлайды.
Қызылорда облысында 19 қарашадағы мәлімет бойынша коронавирус инфекциясының 5 жағдайы тіркелген. Оның 1-і Қармақшы ауданында, 4-і Қызылорда қаласында болған.
Айта кетерлігі, қатерлі дертті жұқтырған адамдардың 3-і бір отбасыдан шыққан. Олар бір-бірімен жақын қарым-қатынаста болғаны анықталды. Қатерлі дертті жұқтырғандар арасында 2011 және 2013 жылы дүниеге келген 2 оқушы бар. Оқушылар қашықтан білім алады.
«Науқастардың арасында ПТР анализі 4 адамнан коронавирус инфекциясымен ауырған адаммен қарым-қатынаста болуына байланысты алынған. Ал 1 адам денсаулық жағдайына байланысты өздігінен медициналық көмекке жүгінген. Науқастардың 1-де аурудың клиникалық белгісі байқалса, қалғанында ауру белгісінсіз түрде анықталды. Қазіргі таңда 1-і облыстық жұқпалы аурулар ауруханасында ем қабылдап жатыр. Қалғаны үйде ем алуда және медициналық бақылауға алынды», — деп мәлім етті Қызылорда облысы санитарлық-эпидемиологиялық бақылау департаментінен.
Ведомство мәліметінше, ауру ошақтарында мамандар індетке қарсы іс-шаралар ұйымдастырылған. Науқастармен қарым-қатынаста болған адамдар медициналық бақылауға алынған.
