Бұл туралы Алматыдағы баспасөз маслихатында Ресей бапкері Сергей Фирсов айтты.
«Аламан» ұлттық спорт порталының мәліметіне қарағанда, жарыс 29 қаңтарда басталады. Әлем чемпионатында бастапқыда хабарланғандай, 15 емес 14 ел қатысатын болды. Соңғы сәтте Моңғолия жарыстан бас тартты.
«Команда алдындағы басты мақсат — әлем чемпионы атағын қорғау. Бірақ, айту бір бөлек, орындау оңай болмайын деп тұр. Швеция мен Финляндия сапында негізгі құрамның бірнеше ойыншылары болмайды. Алайда, бұл олардың ойын өрнегіне еш әсер етпеуге тиіс. Қазақстан да бүгінгі таңда күшейіп алды», — деді Фирсов.
«Межеленген күнтізбе өзгеріссіз қала береді. Орталық стадионның қосалқы алаңында өтетін матчтарға кіру тегін болады. Ал «Медеу» мұзайдынындағы матчтардың билет құны 200 теңге, финалдық матчқа кіру — 500 теңге болмақ», — деп түсіндірді ұйымдастырушылардың бірі Сұлтанбек Сыздықов.
29 қаңтар күні Қазақстан мен Норвегия жарыстың алғашқы ойынын өткізеді. Басталу уақыты Астана уақыты бойынша 20.00-де.
