Ресейдегі әлем чемпионатының жартылай финалына 4 отандасымыз шықты

Ресейдің Санкт-Петербург қаласында өтіп жатқан бокстан әлем чемпионатының ширек финалында Бекзат Нұрдәулетов (81) ирландиялық Крис О’Рейлиді 5:0, Бек Нұрмағамбет (75) американдық Никита Абабиді 5:0, Саматали Толтаев (56) түрік спортшысы Али Ихсан Алагасты 5:0 етіп жеңіп, ал Садриддин Ахмедов (69) қырғыз боксшысы Айбек Ақылбекауулыны нокаутқа ұшыратып, жартылай финалға жолдама алды. Бұл туралы 24.kz мәлім етті.

Сондай-ақ кездесулердің осы кезеңінде Айдос Арапов (52) кубалық Элио Кресподан 2:3, Айболды Дауренұлы (+91) Георгий Чигладзеден жеңіліп қалды.

Айта кету керек, 26 қараша күні Саматали Толтаев австралиялық Сэм Гудманға, Бек Нұрмағанбет неміс Везир Агирманға, Садриддин Ахмедов британдық Мохаммед Акбаровқа, Бекзат Нұрдәулетов украиналық Роман Савицкийке қарсы жекпе-жекке шығады, деп хабарлайды Қазақстан бокс федерациясының баспасөз қызметі.