Республикалық бюджеттен СЭС-ті жабдықтауға 7 млрд. теңге бөлу межеленген

Республикалық бюджеттен СЭС-ті жаңа техникамен жабдықтауға 7 млрд. теңге бөлу межеленген. Бұл туралы бүгін, 23-маусымда "Қазақстанның көліктегі санитарлық- эпидемиологиялық қызметін қазіргі заманға сәйкес жетілдіру жолдары" тақырыбындағы І халықаралық ғылыми-тәжірибелік конференцияда ҚР денсаулық сақтау министрінің орынбасары, республиканың бас санитарлық дәрігері Анатолий Белоног мәлімдеді,- деп хабарлайды KZ-today тілшісі.

Зертханаларды жабдықтау үш кезеңмен жүзеге асырылады, деді А.Белоног. 2005-жылы бірінші кезеңде Республикалық СЭС, 2006-жылы СЭС-тің облыстық орталықтары, 2007-2008-жылдарда қалалық және аудандық орталықтарға қаржы бөлінеді. Республикалық СЭС-тің зертханаларын жаңалауға биыл 85 млн. теңге бөлінеді.

А.Белоногтың айтуынша, 2005-жылы мемлекеттік шекаралардағы темір жол бекеттерінде 20, ал халықаралық әуе рейстерін қабылдаушы әуежайларда 6 санитарлық-карантиндік бөлімшелер ашылды. «ТМД елдерінің арасынан Қазақстанда алғаш рет санитарлық-эпидемилогиялық қызметті осындай ауқымда реформалау жүзеге асырылды. Қазақстанның санитарлық-эпидемилогиялық қызметін реформалау тәжірибесі ТМД өкілдерінің халықаралық үйлестіру кеңесінде талқыланып, бір дауыстан мақұлданды»,- деді бас санитарлық дәрігер.