Көгала қойдай болып жатқан-жасы 40-тағы Фая есімді әйел. Ол 10 жылдан бері арақтың құлына айналған екен. Алақан жайып тапқан-таянғанымен құлқынның қамын күйіттеумен әлек. Баспанасында жарық жоқ болса да, жын ойнақтың ордасы осында. Көршілері күн батқанда ішетіні де, шегетіні де осында жиналады деп дабыл қақты. Арадағы келіспеушіліктің соңы төбелеспен шешілетіндіктен түн баласы тыныштық жоқ дейді.
Гөзәл Хұснидинова, Семей қаласының тұрғыны:
— Барлығы осында жиналады. Күнде айғай-шу. Қақпамның алдында күнде төбелес. Тыныштық жоқ.
Тіпті, бір ғана полиция бөлімшесінің өзі көршілерінің құтын қашырған 50-ден астам отбасын тіркеуге алған екен. Оның он алтысына ата-аналық құқығынан айыру жазасын қолданған. Ал күштеп емдеуге жібергеннің өзі еш нәтиже бермей жатыр. Ауруханадан шыға сала, әдеттеріне қайта басады.