Семейде соңғы 10 жылда алғаш рет жаңа мектеп пайдалануға берілді

Жаңа мектепті салуға республикалық бюджеттен 34 млн. 256 мың теңге, қалалық бюджеттен 20 миллион теңге қаржы жұмсалды. Қажетті құралдармен қамтамасыз етуге жергілікті қазынадан 7 млн. теңге бөлінген. Мектептің ашылу салтанатында сөз сөйлеген Семей қаласының әкімі Амангелді Қажыбаев мектеп құрылысын қысқа мерзімде әрі сапалы жүргізген *Семагрострой*ААҚ құрылысшыларына алғыс айтты. Бобровка ауылына мектеп салу мәселесі осыдан 15 жыл бұрын қозғалған еді. 30 мыңға тарта тұрғыны бар ауыл балалары 3-4 шақырымдағы орта мектептерге қатынап оқиды. "Қыстың қақаған аяздарында қашықтағы мектепке жету әсіресе бастауыш сынып оқушыларына қатты бататын. Жаңа мектептің салынуы бірқатар қиындықты шешіп берді",- дейді қалалық білім басқармасының бастығы Бахты Балғымбаева. Сөйтіп, Бобровкадағы нөмірі 44-ші мектеп 80 орынға, 4-ші сыныпқа дейін есептелген. Алдағы уақытта 2 кезекпен 9-шы сыныпқа дейінгі оқушылар оқитын болады.