Шахтинск қаласында 31 үй мен әлеуметтік-мәдени нысандардың жылыту жүйесі қалпына келтірілді

Қарағанды облысының Шахтинск қаласында апатты жағдайдағы 57 үйдің 31-і мен әлеуметтік-мәдени 12 нысанның жылыту жүйесі қалпына келтірілді. Бұл туралы KZ-today тілшісіне ҚР төтенше жағдайлар жөніндегі министрлігінің баспасөз қызметінен хабарлады.

Төтенше жағдайлар жөніндегі министрлігінің ақпаратына сәйкес, Шахтинск қаласында жылыту жүйесін қалпына келтіру жұмыстары одан әрі жалғасуда. Тентек жылу электр орталығындағы істен шыққан №1 қазандық жұмыс істей бастады. «Жіберілтін судың температурасы 58 градус, кері қайтатын судың температурасы 27 градус, судың айналымы сағатына 2450 тоннаны құрайды»,- дейді министрліктегілер.

Бұдан бұрын да хабарлағанымыздай, 23-қаңтарда Тентек жылу электр орталығында апат болу салдарынан көп пәтерлі 208 тұрғын үй, 17 мектеп, 4 әкімшілік мекеме мен 3 денсаулық сақтау мекемесі жылудан үзіліп қалған болатын.