Өскемендегі Жаңа-Ахмер оқу полигонында «Түлкі аулау – 2019» әскери оқу-жаттығуы басталды, деп хабарлайды Алтайньюс әскери бөлімнің баспасөз қызметіне сілтеме жасап.
"Қазақстан және Қытайдың арнайы бөлімшелері шартты заңсыз қаруланған құрылымды жою бойынша біріккен операция өткізеді. Қазақстан мен Қытайдың Халық-азаттық армиясы Қарулы Күштерінен оқу-жаттығуға арнайы мақстаттағы бөлімшелер мен жедел топтар қатысады. Оқу-жаттығуға екі мемлекеттен 200-ден аса әскери қызметші мен 30 бірлік әскери және арнайы техника, сондай-ақ армиялық авиация тартылды" делінген әскери бөлімнің баспасөз ақпаратында.
Оқу-жаттығу екі кезеңнен тұрады. Әр бөлімшеге тапсырмаларды орындау үшін үш күн уақыт беріледі. Сценарий бойынша заңсыз қаруланған құрылым елдің аумағына еңбек мигранттары ретінде кірген. Олар арандатушылық акциялары мен диверсияларды өткізуде. Жағдайдың одан әрі ушығып кетпеуі үшін, шартты қарсыластың жасағын жою арнайы операциясын өткізу жайлы шешім қабылданды. Бірінші кезеңде екі елдің әскери қызметшілері жиынтық тактикалық жасақ құрады. Басқару органдары мен бөлімшелер жоғары жауынгерлік деңгейіне келтіріліп, белгіленген аумақта марш жасайды. Сонымен қатар, бірлескен арнайы операцияны орындауға дайындалады.
Екінші кезеңде бөлімше түнгі уақытта барлау-іздестіру әрекеттерін жүзеге асырады. Армиялық авиация шартты қарсыластың базасына шабуылдайды. Ұшқышсыз ұшу апараттары әуеден барлауды ұйымдастырса, барлау тобы қарсыласты торуылдауды жүзеге асырады.
«Түлкі аулау – 2019» оқу-жаттығуы жыл сайын өтетінін айта кетейік. Олардың басты мақсаты – халықаралық әскери ынтымақтастықты дамыту мен нығайту. Сондай-ақ арнайы бөлімшелердегі жеке құрамның жеке және топтық машығын жетілдіру. Екі елдің әскреи қызметшілері оқу-жаттығу аясында дағдарыс жағдайында біріккен жоспарлы арнайы жаттығу тәсілдерін қалыптастырады деп күтілуде.
