Солтүстік Атлантикалық Альянс Ауғанстанда тұрақтылық орнатуда Қазақстан атқарған рольді жоғары бағалайды

Солтүстік Атлантикалық Альянс бас хатшысының арнаулы өкілінің айтуынша, Альянс пен Қазақстан арасындағы ынтымақтастық үш бағытта дамитын болады. «Атап айтсақ, олар — «Қазбаттың» әлеуетін арттыру, Қазақстан — Солтүстік Атлантикалық Альянс аясындағы бірлескен іс-шараларды үйлестіру және жоспарлау мәселелері бойынша Қазақстанға қолдау көрсету, сондай-ақ, Қазақстанға төтенше жағдайлардың алдын алу және азаматтардың қауіпсіздігін қамтамасыз ету саласында қолұшын беру болып табылады»,- деді ол.

Сапар барысында арнаулы өкіл қорғаныс министрі Мұхтар Алтынбаев, төтенше жағдай жөніндегі министр Мұхамбет Көпей, Қауіпсіздік кеңесінің хатшысы Болат Өтемұратов пен парламент сенаты мен мәжілісінің халықаралық істер жөніндегі комитеттерінің мүшелерімен кездеседі.
Кездесу барысында Қазақстан мен Солтүстік Атлантикалық Альянс арасындағы әріптестік іс-шараларының бағдарламасын жүзеге асыру жолдары талқыланбақшы. Бұл бағдарлама аясында 2005-жылы Солтүстік Атлантикалық Альянстың процедуралары мен стандарттарын зерттеу, тіл дайындығы, байланыс және ақпараттық жүйелерді оқып-үйрену, бітімгерлік шараларға қатысу тәжірибесін алмасу сынды 140-тай бірлескен шараларды ұйымдастыру көзделіп отыр.