Облыстың ең шеткері өңірі -Уәлиханов ауданындағы Жақсы тұз көлінде бірнеше жылдан бері заңсыз тұз өндіріліп келген. «Кәсіпкерлерде көлде тұз бар немесе жоқтығын анықтау үшін барлау жүргізуге ғана рұқсат болған. Ал іс жүзінде жұмыс үлкен қарқынмен жүргізілгендігі аңғарылады: жұмысшылардың тұздан жасаған қоры көлде күн сайын 250-300 қап тұз өндірілгенін дәлелдейді. Алайда, осынау кәсіпкерләк әрекеттен ауданға бір тиын да салық түспеген»,- деп хабарлайды полиция. Жеті адамнан құралған топ бір қап тұз үшін 20 теңге алып жұмыс істеп келген.
Бұл дерекке қатысты іс материалдары қаржылық полицияға тапсырылды. Олар мемлекетке келген шығынның көлемін анықтаумен бірге заңсыз өндірілген тұздың қайда кетіп жатқанын анықтайды. Алдын-ала мәлімет бойынша, тұз әріқарай өңдеу үшін Ақмола облысының Степногорск қаласына жөнелтіліп отырған.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
