Соңғы 15 жылда еліміздегі діни бірлестіктер саны 10 есе өскен - ҚР үкіметінің жанындағы діни бірлестіктермен байланыс жөніндегі кеңес

Соңғы 15 жылда Қазақстанның оңтүстігіндегі діни бірлестіктер саны 15-17 есе, ал солтүстік және орталық облыстарда 12 есе өскен. Бұл туралы бүгін, 8-шілдеде Астанада "Отан республикалық саяси партиясы конфессияаралық келісімді қолдайды" деп аталған шара барысында ҚР үкіметінің жанындағы діни бірлестіктермен байланыс жөніндегі кеңес төрағасы Аманбек Мұхашев хабарлады.

А.Мұхашевтың ақпартына жүгінсек, бүгінде Қазақстанда 40 конфессияға қарасты 3000-нан астам діни бірлестік тіркелген. «Бір ғана Елордасының өзінде 45 діни бірлестік жұмыс істейді»,- деді ол.

Кеңес төрағасы сондай-ақ, республикамызда діни бірлестіктерге қарасты миссионерлерінің саны да арта түскеніне назар аударды. «Осыдан 5 жыл бұрын елімізде небәрі 3-5 миссионер жұмыс жүргізсе, бүгінде әлемнің 22 елінен 336 миссионер жүр»,- деді А.Мұхашев. Оның айтуынша, миссионерлердің басым көпшілігі христиан дінінің басты бағыттарының бірі болып табылатын протестантизм өкілдері.