Қызмет бабында қаза болған полицейлерді еске алу шарасына келген қарашаның қарасы қалың. Марқұмдардың туыстары мен әріптестері, қала тұрғындары облыстық Ішкі Істер департаменті алдына жиналды. Көпшілік сол қанды қырғында ерлікпен қаза болған Ғазиз Байтасовтың ескерткішіне гүл шоқтарын қойды. Бүкіл Таразды дүрліктірген лаңкес көше ортасында өз-өзін жармақ болғанда оны құшақтай құлап, арам пиғылын іске асыруға мүмкіндік бермей өзі де көз жұмған осы полиция капитаны болатын. Батыр ерлігі ескерусіз қалған жоқ. Марқұм Ғазиз Байтасовқа бірден «Халық қаһарманы» атағы берілді. Қара жамылған басқа да отбасылар бір-бір пәтермен қамтылып, материалдық көмек берілген болатын.
Гүлзат Шіркеева, Ғ. Байтасовтың анасы:
— Ғазиз ержүрек, еш уақытта сөзін екі қайталамайтын. Бір айтқаннан түсінетін. Айтпасаң да қабағыңнан түсінетін. Сіз не айтатыңызды мен біліп тұрмын дейтін. Ақ адал жүрегімен кетіп отыр ғой. Мыңдаған халықты қорғаймын, елді қорғаймын деп, әйеліне, баласына да қарай алмай кетті ғой.
