Үш жыл бойы әлеуметтік нанды 45 теңгеге алып үйренген әлеумет бүгін жаңа бағаға мойынсұнуға мәжбүр. Ал саудагерлер ас атасының құнын амалсыз көтердік деп отыр.
Рыскүл Исаева, сатушы:
-Қазір 50 теңге болып жатыр. Енді 47 теңгеден әкеліп беріп тұр ғой, көріп тұрсыз. Пакеттің өзін мың теңгеден алып келдім міне.
Сөредегі бағалар әп-сәтте өзгеріп шыға келді. Дегенмен, кей ірі сауда орындары нанның бұрынғы құнын әлі де сақтап тұр. Бірақ онысы ұзаққа бармасы анық. Себебі құнды көтеруге биліктің өзі рұқсат берген. Оған Үкіметтің ұн алуға субсидия беруден бас тартуы себеп екен.
Нұрлан Нұрғазиев, Жамбыл облыстық ауыл шаруашылығы басқармасының бөлім басшысы:
-Бірінші қазаннан бастап субсидияланып жатқан жоқ. Бірақ төртінші тоқсанға, үкіметте субсидия мәселесі қаралып жатыр. Бірақ жаңа меморандуммен келетін субсидия бағасы, кішкене көтеріңкі болады.
Одан бөлек, сұйық майдың да ақысы тұрғындардың қалтасына салмақ салуда. Соңғы бір аптаның ішінде онсыз да өскен баға тағы да 20 пайызға көтерілді. Қазір сұйық майдың литрі кемі 400 теңге.
Ділдә Орманова, Тараз қаласының тұрғыны:
-Сұйық май қымбаттаған. Шекер, бәрі қымбаттаған. Ала бермейміз ғой бәрін, ең керектісін көрейін деп барсам бәрі қымбатттаған. Жаңадан бағасын қойып қойған, не істейміз енді.
Шенеуніктер өсімдік майының құны шарықтау шегіне жетті дегені бекер дейді. Бар болғаны 5 пайыз көтерілді деп міз бағатын емес. Ал жалпы бағаның өсуін зауыттардан ескі бағамен әкелінген өнімнің таусылуымен байланыстырды.
