Тексеру қорытындысы бойынша Наурыз банктің жеке капиталы 15 млн. доллар көлемінде кері мәнге ие болып шықты

Уақытша әкімшілік жүргізген тексеру қорытындысы бойынша, 2004-жылғы 1-қаңтардағы жағдаймен Наурыз банктің жеке капиталы 1 млрд. 938 млн. теңге немесе шамамен 15 млн. доллар көлемінде кері мәнге ие болып шықты. Бұл туралы бүгін, 14-желтоқсанда Алматыда өткен баспасөз мәслихатында ҚР қаржы нарығы мен қаржылық ұйымдарды реттеу және қадағалау Агенттігінің төрағасы Болат Жәмішев хабарлады.

Несиелік қоржын, дебиторлық берешек пен шартты міндеттемелер бойынша жинақталған провизияның жалпы көлемі 4,068 млрд. (шамамен 30 млн. доллар), соның ішінде несиелер бойынша — 3,199 млрд., дебиторлық берешек бойынша — 559 млн., шартты міндеттемелер бойынша — 310 млн. теңге болды.

Сонымен бірге Наурыз банк салық мекемелері тарапынан 1 млрд. теңгенің алашағына қатысты мәселе бойынша сот арқылы дауласуда. Бұл қаржыны ревизорлар провизия қалыптастырылуы тиіс берешектер категориясына қосқан жоқ.