Тимур Сүлейменовтың айтуынша, бүгінде бұл сөз мүлде басқа мағынада қолданылады. Ал осындай түсініктегі құнсыздану елімізде орын алмайды, деп хабарлайды Caravan.kz медиа порталы.
«Девальвация туралы айтар болсақ. Біріншіден, бізде, өкінішке қарай, қалыптасқан түсініктегі девальвация — яғни күрт құнсыздану, біртіндеп жиналып, содан кейін бір күнде, таңертең оянғанда басқа валюта бағамын көру — бұл жағдай инфляциялық таргеттеу мен еркін өзгермелі айырбас бағамы режимінде мүмкін емес. Мұны тағы бір мәрте нақтылап айтқым келеді. Біз көріп отырмыз: теңге бағамы өзгереді, бірақ күрт секіріс жоқ. Ішкі және сыртқы факторлардың ықпалымен теңге күшеюі де, әлсіреуі де мүмкін», — деп түсіндірді төраға.
Дәл болжам болмайды — бәрі мұнай бағасына байланысты
«Егер еліміздің негізгі экспорттық тауарларына, әсіресе мұнайға баға қолайлы деңгейде сақталса және сонымен қатар импорт көлемі азайса, онда жағдай әлдеқайда тұрақты болады. Қазіргі кезде әлемде алдағы уақытта жаһандық қаржы, энергетика және тауар нарықтарында не болатынын нақты айта алатын экономист жоқ деп ойлаймын. Себебі белгісіздік тым көп», — деді Сүлейменов.