Ресми сайланған АҚШ президенті Дональд Трамп сайлаушылардың дауыс беру қорытындысына түсініктеме беріп, елді жұмылдыру арқылы ұлы державаға айналдыратынын айтты, деп хабарлайды Baq.kz.
«Аталмыш тарихи қадам жасалған соң жарқын болашаққа нық сеніммен қарай аламыз. Мен елімізді біріктіріп, барша америкалықтарға бірдей президент болу үшін көп еңбектенетін болам. Біріге отырып Американы қайтадан ұлы державаға айналдырамыз», — деген Трамптың сөзін мысалға келтірді CNN.
Twitter-дегі жеке парақшасында Трамп өзіне дауыс бергендердің бәріне алғыс айтты.
«Біз жаңа ғана ресми түрде сайлауда жеңіске жеттік (медианың қанша бұрмалап, нақты ақпарат бермегеніне қарамастан)», — деп жазды ол.
Естеріңізге сала кетейік, АҚШ сайлаушылар алқасының 270-тен аса мүшесінің дауысына ие болған Трамп ресми түрде АҚШ-тың 45-ші президенті атанды.